ທີມງານວິຊາການ ກົມທຸລະກິດພະລັງງານໄດ້ໄປຕິດຕາມການກໍ່ສ້າງໂຄງການເຂື່ອນໄຟຟ້ານໍ້າທາ 1 ໃນລະຫວ່າງວັນທີ່ 26-31 ມັງກອນ 2014

ໂຄງການເຂື່ອນໄຟຟ້ານໍ້າທາ 1 ໄດ້ເຊັນສັນຍາສໍາປະທານ ກັບລັດຖະບານ ສປປ ລາວ ໃນວັນທີ່ 18/11/2014  ເຊິ່ງໂຄງການແມ່ນຕັ້ງຢູ່ ເມືອງ ຜາອຸດົມ, ແຂວງບໍ່ແກ້ວ ແລະ ອ່າງເກັບນໍ້າຂອງເຂື່ອນແມ່ນກວມເອົາ 2 ຄື ແຂວງ ຫຼວງນໍ້າທາ ແລະ ຜົ້ງສາລີ, ມີກໍາລັງການຕິດຕັ້ງ 168 MWແລະ ຈະດໍາເນີນການຜະລິດ ແລະ ຂາຍໄຟໃນປີ2019.

               ໃນວັນທີ 26-31 ມັງກອນ 2014 ທີມວິຊາ​ການຂອງກົມທຸລະກິດພະລັງງານ ​ເຊິ່ງນຳພາ​ໂດຍ ທ່ານ ສົມ​ພິດ ​ແກ້ວ​ວິຈິດ ຮອງ​ຫົວໜ້າກົມ​ທຸລະ​ກິດ​ພະລັງງານ ທັງ​ເປັນ​ຜູ້​ຊີ້​ນຳ​ ພະ​ແນ​ກພັດທະນາ​ໂຄງການ ໄດ້ໄປຕິດຕາມການກໍ່ສ້າງໂຄງການເຂື່ອນໄຟຟ້ານໍ້າທາ 1  ຈຸດປະສົງ​ໃນ​ການ​ລົງ​ຢ້ຽມຢາມ​ພາກ​ສະໜາມ​ໃນ​ຄັ້ງ​ນີ້ ​​ແມ່ນ​ເພື່ອ​ເກັບ​ກຳ​ຂໍ້​ມູນ​ກ່ຽວກັບ​ສະພາບ​ການຈັດ​ຕັ້ງ​ປະຕິບັດ​ໂຄງການ ລວມທັງ​ຂໍ້​ສະດວກ ​ແລະ ຂໍ້​ຫຍຸ້ງຍາກ ​ແລະ ບັນຫາ​ທີ່​ເປັນ​ອຸປະສັກ​ຕ່າງໆ ​ເພື່ອ​ກະກຽມ​ໃຫ້​ແກ່​ການ​ເປີດ​ກອງ​ປະຊຸມ​ສຳ​ມະ​ນາ​ວິຊາ​ການ ​ເພື່ອ​ສ້າງ​ຄວາມ​ເຂົ້າ​ໃຈ​ເປັນ​ເອກະ​ພາບ​ກ່ຽວກັບ​ບັນຫາ​ປິ່ນ​ອ້ອມ​ການ​ດຳ​ເນີ​ນ​ໂຄງການ ​ແລະ ກອງ​ປະຊຸມ​ຄະນະ​ກຳມະການ​ຊີ້​ນຳ​ລວມ​ໂຄງການ ທີ່​ຈະ​ຈັດ​ຂື້ນ​ໃນ​ໄວໆນີ້.

  • ໃນວັນທີ 28/1/2015 ທີມງານວິຊາ​ການ​ຂອງ ກົມ​ທຸລະ​ກິດ​ພະລັງງານ, ​ໄດ້​ສົມທົບ​ກັບ​ຜູ້ຕາງໜ້າ ໜ່ວຍງານ RMU ​ແຂວງ​ບໍ່​ແກ້ວ ​ແລະ ຄະນະ​ບໍລິຫານ ບໍລິສັດ​​ໄຟຟ້າ​ນໍ້າ​ທາ 1 ລາວ ພາວ​ເວີ ຈຳກັດ ​​​​ລົງ​ຕິດຕາມ​ການກໍ່ສ້າງ​ໂຄງການ​ນໍ້າ​ທາ 1 ​ເຊີ່ງ​ມີ​ລາຍ​ລະອຽດັ່ງ​ນີ້:

ການ​ຕິດຕາມ​ການ​ກໍ່ສ້າງ​ພາກ​ສະໜາມ:

ການ​ກໍ່ສ້າງ​ພາກ​ສະໜາມ​ໄດ້​ມີ​ການ​ດຳ​ເນີນ​ໄປ​ເປັນ​ປົກກະຕິ ​​ໂດຍ​ໄດ້​ມີ​ການ​ປະຕິບັດໜ້າວຽກທີ່​ສຳຄັນ​ຄື:

-       ​ໄດ້​ສຳ​ເລັດ​ການ​ທະລຸ​ທາງ​ເຂົ້າ​ຫາ​ໂຄງການ ມີ​ຄວາມ​ຍາວປະມານ 64 ກິ​​ໂລ​ແມັດ, ກຳລັງ​ເຮັດ​ຄອງ​ລະບາຍ​ນໍ້າຕາມ​ເສັ້ນທາງ ​ແລະ ປັບ​ລະດັບ​ໜ້າທາງ.

-       ສຳຫຼັບຈຸດ​ເຂື່ອນຫຼັກ ​ໄດ້​ສຳ​ເລັດ​ການ​ຕິດ​ຕັ້ງ​ຂົວ​ຂາມ​ນໍ້າ​ຊົ່ວຄາວ, ສືບຕໍ່​​ເຮັດ​ກັນ​ເຈື່ອນບໍລິ​ເວນ​ກໍ້າ​ຂວາ​ຂອງ​ເຂື່ອນ ​ແລະ ດຳ​ເນີນ​ການ​ຂຸດ​ເຈາະ​ອຸ​ໂມງ​ອ່ວຍ​ນໍ້າ.

-       ສຳລັບ​ຕິດ​ພັນ​ກັບ​ວຽກຍົກຍ້າຍ​ຈັດ​ສັນ ​ແລະ ​ຟື້ນ​ຟູ​ຊີວິດ​ການ​ເປັນ​ຢູ່ຂອງ​ປະຊາຊົນ ​ເຊິ່ງວຽກດັ່ງກ່າວ ບໍລິສັດ​ໄຟຟ້າ​ລາວ ​​ໄດ້​ເຊັນ​ສັນຍາ​ ກັບ ບໍລິສັດ​ນໍ້າ​ທາ 1 ລາວ ພາວ​ເວີ ຈຳ​ກັດ ​ເພື່ອມາ​ເປັນ​ລູກຈ້າງ​ໃນ​ການ ຈັດ​ຕັ້ງ​ປະຕິບັດ​ວຽກດັ່ງກ່າວ ມາ​ຮອດ​ປະຈຸ​ບັນ ບໍລິສັດ​ໄຟຟ້າ​ລາວ ​ເຊິ່ງ​ເປັນ​ຜູ້​ຮັບ​ເໜົາ​ໄດ້ລົງ​ມື​ກໍ່ສ້າງ​ບ້ານ ຈັດ​ສັນຢູ່​ເຂດ ​ບ້ານຫາດໝວກ ​ແຂວງ​ບໍ່​ແກ້ວ ປະຈຸ​ບັນ ສຳ​ເລັດ​ປະມານ 50 ຫຼັງຄາ​ເຮືອນ.